Luhak Nan Tigo "Agiah Taruih"

Rumah Adat Minangkabau, Sumatera Barat

PARTAMO, LUHAK NAN TUO; LAMBANG KUCIANG, WARNA BENDERA KUNIANG. Adopun kuciang adolah binatang lihai, tinggi pangaruah jo berwibawa. Bandera kuniang tando kamanangan. Takaik tujuannyo, urang cadiak adi kuasa, sumber ilmu pangatahuan, "Sains Teknologi" kato rang kini.

KADUO, LUHAK NAN TANGAH; WARNA SIRAH, HARIMAU CAMPO. Adopun filosofinyo barani karano bana, hukum nan tidak makan bandiang banamo parentah "syarak".

"Calak alah tajampun ado tingga baa manyampaikan
Adaik alah syarak-pun ado tingga dek awak mamakaikan" (moral jo spiritual)

KATIGO, LUHAK NAN BUNGSU; CORAK HITAM, LAMBANG KAMBIANG. Rila jo saba bausao, rumpuik nan indak pantang daun, dek padi mangko manjadi, dek ameh mangkonyo kameh. Mangecek iyo jo pitih, bajalan tantu jo kain, karajo tantu jo nasi

Kok ingin samparono, manjadi urang baharago, sajundun jasmani jo rohani, dunia dapek akhirat buliah, mako sarekkan kapalo jo pangatahuan, panuahkan dado jo agamo, gasaklah paruik jo harato

 

>> Dikutip dari "Pitaruah Ayah oleh Yus Dt. Parpatiah"